BATZ: Susperraldi baten historia. Erantzukidetasuna, erresilientzia eta interkooperazioa

Abstract

BATZ Igorren dagoen kooperatiba bat da, MONDRAGON taldekoa. Bere itxiera kolpe latza izango litzateke Bizkaiko Arratia eskualdearentzat. Eta egoera hori benetako aukera izan zen kooperatibak aurre egin behar izan zion krisian. Zorionez, BATZek egoera irauli ahal izan du, eta, gaur egun, etorkizuna duen proiektu sozio-enpresariala da. Lan honetan, kooperatibak 2016 eta 2025 urteen artean izandako krisia eta susperraldi ekonomikoa aztertzen dira. Kasu hau esanguratsu egiten dituen bereizgarri batzuk badira: automozioan diharduen kooperatiba industrial handia da BATZ, 1.300 langile baino gehiago dituena eta nazioartean presentzia garrantzitsua daukana. Argitalpena, gainera, kooperatiba bat krisian murgiltzen denean jokoan sartzen diren mekanismoak deskribatzeko asmoarekin ere egin da. Izan ere, krisi garaian, kooperatibek kapital- enpresekiko duten diferentziala modu dibulgatzailean hurbiltzeko helburua dauka lanak. Kasuaren azterketa elkarrizketa sakonetatik eta protagonisten ahotsa jasotzen zuten eztabaida- taldeetatik abiatuta eraiki da, eta testuan zehar bildu dira ahots hauetako batzuk. Gainera, irakurleak MONDRAGONen egituratzen diren interkooperazio mekanismoei buruzko azalpenak aurkituko ditu lanean zehar; izan ere, horiek gabe ezingo litzateke azaldu BATZ kooperatibaren berreskuratze prozesua. Lanean ideia nagusi bat azaleratzen da: BATZ berreskuratzea kooperatiba osatzen duten pertsonen konpromisoari eta MONDRAGON taldearen elkartasun-laguntzari esker izan da posible.